TVB视后李佳芯近年屡传被雪藏，早前TVB《万千星辉颁奖典礼2023》上，有约在身兼有2项提名嘅Ali，居然不见芳踪，甚至对颁奖礼不闻不问兼唔喺社交媒体出post。事后Ali解释因为身体不适而缺席，但被问到系咪续约时，Ali就话未有实质结论，双方洽谈紧，似乎仲未倾掂数。

谭俊彦凭《换命真相》获封视帝

外界都估Ali系咪等到今年完约走人，殊不知有传媒今日爆料，TVB即将开拍嘅喜剧《麻雀乐团》，会由李佳芯伙拍谭俊彦Shaun组成视帝视后级主角阵容，似系释出善意。

据报导指，《麻》故事一如剧名，系关于打麻雀同音乐，Ali饰演性格豪爽嘅麻雀馆管数阿姐，而谭俊彦就饰演佢老板。两人会由欢喜冤家发展成为情侣，至于剧中Shaun有个女，将会由力捧小花郭柏妍主演。对比起Ali被冷待之后所拍嘅剧集《智能爱人》同《有种好男人》，《麻雀乐团》卡士到故事都明显吸引好多。

李佳芯

呢套剧将于3月开工，Ali回覆查询时确认消息，仲话期待演新角色。而男主角Shaun都话已经睇咗剧本，觉得同Ali演欢喜冤家好好玩。

有传Ali因为社会立场被内地封杀，去年底TVB台庆show《万千星辉贺台庆》，即使李佳芯盛装示人，但都系被冷待靠边站。而过去2年TVB内地官方微博都将Ali喺台庆现身嘅镜头，以打格仔遮晒靓样。贵为视后，李佳芯近年被安排做综艺主持居多，主演剧集大幅减少，2020年至今只系拍过2套剧，相比上位期嘅一年三套剧简直天渊之别。

李佳芯

去年底，掌管艺人事务嘅TVB高层乐易玲回应李佳芯被遮样事件时表示，“我谂好多嘢佢（Ali）都会明白，佢知我哋好锡佢”。乐小姐又大赞Ali系个好好嘅艺人，“真系好好，我会尽量想办法，继续同佢有多啲合作机会”。